今屆洲際國家盃未完，但我求大俠都幾肯定今屆賽事主角唔係主辦國俄羅斯或者世盃盟主德國，更加唔係基斯坦奴朗拿度，而係視像裁判（VAR）技術！行新技術係好，最弊VAR喺禮拜日場德國3:1贏喀麥隆嘅B組最後一輪分組賽又瀨嘢，64分鐘喀麥隆守將馬保卡被指同安利簡恩爭搶波嗰陣舉腳過高，球證路丹（Wilmar Roldan）本來出示黃牌，後來徵詢VAR後決定改判紅牌，點知錯派畀另一喀麥隆球員施亞尼，後來再經VAR修正後先將馬保卡驅逐出場，亂晒龍，再次成為網民笑柄。
黃牌變紅又點錯相
喀麥隆教練布魯斯賽後㷫過火屎：「我唔知發生咩事，首先係黃牌，跟住係紅牌畀咗第二個球員。唔好問我發生咩事！當時唔明白，𠵱家都唔明白，球證亦冇任何解釋。」連德國教練路維賽後都有嘢講：「我同簡恩傾過，佢唔認為呢個係犯規，我亦唔認為馬保卡有意圖傷害對手。喺使用VAR嘅層面上，我哋的確需要適應，但起碼佢喺部份情況證明咗有用，例如入球有冇越位；當然，佢仲需要作出微調，令判決可以更快執行。」