上星期跟金融界八卦公在灣仔七福食晏，他忽然提到內地有錢佬今時今日最關心兩件事，叫我猜一猜，男人不外乎都是錢和靚女，點知我竟然猜錯晒。他開估話，內地有錢佬最關心自己健康，以及如何可以在香港買到一兩隻殼旁身。
想想又有道理，在香港買一兩隻殼，一來方便走資，二來方便抵押借貸，必要時又可以轉手賣殼賺幾個億；有錢之後，最緊要當然是身體健康，否則何需大費周章去搵錢？難怪做GYM、做YOGA成行成市，保健產品、養生食療長做長有。
聽講，新近有一門叫做「健康管理」的生意模式，由專業人士根據閣下的日常作息與健康狀況，推算閣下還有幾多歲命，再提供合適的醫療保健建議。聽落，成件事跟搵人算命差無幾，都是身心輔導的一種（哈哈）。
其實養生之道，不外乎早睡早起，多做運動，飲食清淡健康，好多城中大孖沙，日常都是蒸魚、烚菜、滾湯又一餐，超人鍾意打GOLF，四叔喜歡每日按摩，各適其式，加埋心胸廣闊，心地善良，笑多啲，自然長命又醒神喇。
高淑嫻
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk