容祖兒噚日同張敬軒、許廷鏗、吳業坤喺紅館出席港台活動，祖兒講番大前晚擔任台灣金曲獎頒獎嘉賓，因為讀唔出得獎者個名，笑住叫對方自己上台，結果被圍插唔尊重人。事後祖兒急急拍片道歉補鑊，但依然被批評唔夠誠意，結果又要急刪道歉片呢件事，祖兒話：「第一次去呢個大型頒獎禮，將心比己覺得應多啲準備，事前怕讀錯名，有問過（大會）可唔可以睇結果先，但唔得。揭曉結果嗰時已心知不妙點讀呢，呢啲都係命運安排。」仲話過咗去就算，唔會因為捱轟而耿耿於懷，希望下次再做好啲。
當晚頒獎禮另一個焦點，就係盧凱彤得獎時驚爆出櫃兼已婚，祖兒自爆認識盧凱彤另一半余靜萍：「工作上合作過，小余幫我影過唱片封套同MV，阿妹（盧凱彤）有嚟探班，見證佢哋發展，經歷過好多，戥佢哋開心。」
坤哥心口瘀晒
軒仔就話以前同盧凱彤係鄰居，成日見面一齊食飯，好開心盧凱彤人生去到另一階段。另外，坤哥同麥明詩合作拍劇，一齊坐車玩直播，坤哥澄清佢哋唔係拍拖，佢笑住話：「已經害咗好多人，我哋了解咗都唔會發展，我頭髮唔夠亂。」之後坤哥仲打開自己個心口，話拍劇時被麥明詩打到一大撻瘀青，坤哥話：「嗰幕被佢發洩打咗幾拳，因為拍咗幾個角度，你哋幫我追討索償！」
撰文：馮仁昭
