拍過無綫劇集《當四葉草碰上劍尖時》嘅38歲李雨陽，12年離開無綫後轉投王維基嘅香港電視網絡（HKTV），但因HKTV不獲政府發免費電視牌照，令李雨陽嘅演藝事業夢碎，近年佢就轉行賣雞。
「識咗幾個月」
不過，曾經同陳靜（DaDa）傳緋聞嘅李雨陽，感情生活相當順暢，上個月被發現同細十一年嘅圈外女友鄭嘉詠入紙申請結婚，噚日佢終於做「老襯」。佢噚日好開心咁喺微博宣佈：「由今天開始，我們就成為一家人了，願我倆這樣手牽手一輩子。」佢仲貼咗同老婆嘅合照，另一張係同老婆戴住結婚戒指手拖手，雖然唔見李雨陽大事鋪張，似乎係簡簡單單註冊，但就一臉幸福。
噚日打畀李雨陽，佢好開心咁話：「多謝！多謝！」佢又話同太太識咗幾個月，承認係閃婚：「我哋閃婚呀，咁我年紀都唔細，啱就結婚。」問佢係咪奉子成婚時，佢就否認話唔係。李雨陽透露老婆做兼職地產，仲大讚老婆係好女仔。
