大家會認為梁振英似唔似只有七日就下台的特首呢？基本上在特首選舉3月塵埃落定之後，梁就應該低調淡出公眾視野，扮演看守政府角色。但佢比選舉前更加高調，多次率團北上考察，臨落台前一星期仲要搞出一個求其標準工時及長服金對沖方案，試圖主導下屆政府重大政策。此舉有違政治倫理，亦十分之樣衰，究竟這是否共產黨所默許？甚至是管治的新模式呢？
全國人大常委范徐麗泰接受港台專訪時就針對「太上皇」現象發炮，清楚指出香港管治應由當時的特首和其管治團隊負責，一些無權位的人，如普通市民和非建制中人，評論政府管治未必影響大局，但作為國家領導人，說話則要非常小心，不應再給予太多個人意見，忠告他們「不在其位，不謀其事」。這個國家領導人，當然就是指梁振英。
范徐麗泰慌死大家唔知佢插邊個，話前特首曾蔭權卸任後，無再評論香港事務；現時擔任全國政協副主席的前特首董建華，主要在政協會議上，才談及香港事務，亦不會提出與當屆政府施政不同的意見。范太當然唔會出於義憤先插梁振英，而係梁係自封太上皇，毫無規矩，犯了中共政治大忌。眾所周知，今次新政府重組一班梁營智將被清洗，最惹火之四人幫張志剛、王卓祺、邵善波及高靜芝會走人，另一智將馮煒光仍死唔斷氣四圍點火頭，加上一眾愛字頭群眾組織，如果7月1日之後，呢棚人仍繼續高調指點江山，四出撩事鬥非，以消滅港獨為己任，咁林鄭仲使管？
林鄭自知新班子成員弱勢，牌頭唔夠，唯一方法提高民望就是幹實事，上場頭100日整幾單民生嘢，例如50億新增教育撥款、加強安老院舍服務等，攞個頭彩。但前提係政治上要吹和風，令社會氣氛好轉，先至凸顯出新政府放棄政治鬥爭為綱的施政新風格。梁及中聯辦當然唔想見到政治矛盾消失，因為冇咗尖銳鬥爭形勢，太上皇基礎就消失於無形。所以張曉明、梁振英繼續一唱一和，高調表示要廿三條立法、對港獨零容忍云云。𠵱家仲話硬推老左教聯會大媽做教育局副局長，本來由形象較中立的局長楊潤雄低調做國教唔多覺，但中聯辦真係慌死冇人知，大鑼大鼓搵件福建中學校長兼功能組別敗選大媽去做教育官員，即係變相為下一波反國教運動吹雞，擺明唔想社會休息。如果新政府一開波就搞廿三條同國教入幼稚園，咁就好玩，本來已經碎片化的本土運動，定必再抬頭，乜嘢施政新風、理財新哲學，通通都要讓路畀政治鬥爭。
梁為個人政治野心，為夾死繼任人無法改弦更張，繼續喊打喊殺，正如反對假強積金對沖方案人士，指梁咪再呃人，「搵狗扮賊」，呢四字真言令他被逐出議會。大家想想，梁「搵狗扮賊」，其欺騙對象，除了香港人，還有中央！
添馬男
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk