【本報訊】旅遊書銷量創佳績，但中伏情況同樣「出色」。《蘋果》綜合旅遊書4大伏位，錯地址、錯交通、「照騙」、誇張失實樣樣齊。專欄作家陶傑稱旅遊書盛行皆因畸形「劏房經濟」，令年輕人放假都要看攻略善用每一刻，頓失旅行悠閒意義，「越暢銷越覺得香港好悲慘」。
按圖索驥是旅遊書最基本用法，但市民Gary卻曾被誤導，「跟住地圖去，明明佢寫個地方係A區，原來真正地址喺C區，中間都爭咗一段路」，要靠自行Google才發現出錯。
旅遊網Travel Pop負責人Francis亦指，試過按書上資料在台灣坐車，等半天始發現整條路線已取消。以自駕遊為主的梁小姐則屢被書上照片所騙，試過去台灣某個地方，「影相出嚟好靚最吸引，去到原來得一個corner，覺得好嘥時間」。
陶傑：暢銷證明港悲慘
經常周遊列國的專欄作家陶傑坦言，旅行應着重心靈感受，不值得花錢買攻略式旅遊書，「好似馬可孛羅，佢冇講過去中國嗰程船幾多錢，亦都無講皇帝嗰餐係幾多金幣，而係講自己旅行所見所聞，咁先至值得流傳後世」。
陶傑認為旅遊書暢銷源於本地畸形的「劏房經濟」，「年輕人一個月搵萬零蚊，劏房交租畀咗6、7千，辛苦儲錢去玩，唔怪得佢哋要睇攻略書」。他指旅行意義在於悠閒，如花一整天在海邊看海鷗感受當地生活，而非追趕景點，「越暢銷越覺得香港好悲慘，係好淒涼。」
■記者佘錦洪
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk