【《蘋果》專訪】49歲的李克勤入行30年，好惹是非的他不時被直線或曲線抽擊，曾被網民改花名「送禮勤」，出戰內地《蒙面歌王》節目又被王喜嘲「自貶身價」。日前克勤到茶餐廳，貼地跟市民接觸測試反應，在娛樂圈度過了10,950天的他自覺幸運：「經過好多高低起跌，仲可以開演唱會出唱片。」
撰文：余燕儀
李克勤是少數由80年代橫跨至今的歌手，將於9月假紅館舉行「慶祝成立三十周年」演唱會，入行多年不時有是非衝擊，日前克勤現身大坑的茶餐廳，貼地跟市民傾偈問喜歡他哪首歌？有阿叔表示：「鍾意咗你二十年㗎啦。」有後生仔說：「我三歲就開始聽《球迷奇遇記》。」克勤慶幸說：「我覺得好幸運，自己唔係條件非常好嘅歌手，經過好多高低起跌，到𠵱家仲可以開演唱會出唱片，去茶餐廳都有人搵我影相，幾好吖。」
《30克》送禮勤
回望三十年的情與義，克勤的言行都受網民熱議，甚至被改「送禮勤」花名取笑，但他坦言沒怨過網民：「送吓禮咁啫，做得呢行咪當娛樂大家，送禮係美德，而且嗰件事，我又覺得錯不在我，如果你覺得唔夠有型，咪唔夠有型囉。新歌《30克》講過往三十年喺我身上發生嘅事，我都有提番曼聯冇收我禮物，作為呢個年代仲喺娛樂圈活躍嘅藝人，如果連一個咁簡單都接受唔到，你條線未免訂得太高。」
沒怨過網民，克勤有否嬲過王喜呢？前年克勤參加內地歌唱比賽節目《蒙面歌王》，王喜在facebook貼克勤參賽短片留言：「自貶身價！」克勤有感而發：「內地節目為內地觀眾而設，如果以香港標準可能未必啱睇，點解一定係貶呢？參加節目不外乎兩樣嘢，想攞到龐大市場知名度同金錢利益，淺白啲講句，都係搵食啫，如果歌手代表你嘅地方打入內地市場，對於香港人嚟講，應該戥佢高興啦。」
冇份四大天王
問到曾否介意沒被封為四大天王？克勤坦言：「四個人打牌，第五個冇得打，惟有希望打完四圈執位參埋你玩咁囉，其實有時啲嘢好難講，柳暗花明又一村，如果當時係五個或六個人打牌，未必有左麟右李呢。」雖然克勤歌喉被讚零瑕疵，但亦有批評唱功刻板，他說：「我覺得歌手可以喺一個地方做咗咁長時間，而又未被淘汰，多多少少都有佢存在價值，鍾意咪聽唔鍾意咪唔聽，等如碟頭飯你覺得好有風味喎，如果覺得包裝唔靚咪去其他餐廳囉，香港係自由社會，你咪揀你鍾意嘅，就係咁簡單。」
形象：Queenie Yu
化妝：Angel Y
髮型：Adolph bow
場地提供：祥勝茶餐廳
