要數香港最具動員力嘅左派組織，一定唔少得港區省級政協委員聯誼會，聯誼會喺11年前由中聯辦支持下成立，港區省級政協常委同委員一律自動成為會員，就算卸任嘅亦可申請，所以計計埋埋會員多達2、3,000人，難怪每逢香港有各式各樣嘅選舉，總會有消息流傳，聯誼會積極動員助選，為愛國愛港出一分力！
「雙料」政協 根正苗紅
近日建制圈流傳聯誼會就換屆，接班人已經揀定，有傳現任常務副會長施榮懷（圖）將會接替譚錦球出任會長，另一個常務副會長鄭翔玲就會接任主席。
施榮懷嘅爸爸施子清係福建幫大佬，亦係全國政協前委員，而佢本人則係「雙料」政協，同時係北京市政協常委及全國政協委員，夠晒根正苗紅嘞啩，近年仲落力幫手反佔中㖭，無功都有勞噃！
八方問過施榮懷，佢直認稍後會接棒做會長；問及過去每逢選舉關鍵時刻，聯誼會都會發功為建制候選人拉票、甚至各區有必保名單等，咁佢上任後係咪會延續呢方面嘅工作呢？佢就話唔會做踩界嘅事，但強調擁護《基本法》同支持一國兩制係香港人共同心願。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk