曼聯中場保羅普巴同祖雲達斯翼鋒古達度，上周六喺哥倫比亞為各自嘅慈善基金踢番場波籌款；普巴三兄弟都有落場，其中效力鹿特丹斯巴達嘅二佬馬特斯普巴仲梅開二度，搶咗賽前喺ig宣佈普巴基金誕生、今場入一球嘅細佬保羅普巴風頭，最後普巴隊以6:3大勝古達度隊。
二佬入兩粒贏保羅
普巴三兄弟全部都係球員，大佬費倫丁普巴係中堅，效力法甲聖伊天，啱啱嗰季歐霸盃32強曾經同曼聯交手；二佬馬特斯普巴就踢前鋒，剛季為鹿特丹斯巴達喺荷甲入五球，係陣中二號射手。佢哋當然唔及細佬保羅普巴威啦，但就今場黎講，馬特斯普巴就梅開二度，叻過只入一球嘅細佬喇。呢邊普巴隊以普巴三兄弟最搶鏡，嗰邊廂古達度隊就有古達度同埋哥倫比亞隊友奧斯賓拿、卡路士巴卡，加上有九個入球，總算值回票價啦。
至於曼聯明星隊將會喺下周五作客魯營，同巴塞隆拿明星隊踢表演賽，之後九月二號，曼聯就喺奧脫福再鬥巴塞；紅魔陸續公佈明星隊成員，深受球迷愛戴嘅南韓中場朴智星就話會兩場比賽都參加。36歲嘅星爺話：「好開心可以再披曼聯戰衣，同一班名宿比賽，感覺真係一流。」巴塞嗰邊有兩大巴西名將朗拿甸奴同李華度參戰，又有古華特回歸，那些年嘅感覺返晒黎。
摩佬棄C朗 10億買卡尼
返去現代，據英媒《鏡報》講，曼聯領隊摩連奴唔買32歲嘅C朗，希望用破普巴保持嘅最高轉會費紀錄，以一億鎊（約10億港元）收購英超神射手兼熱刺靈魂哈利卡尼喎。