賭王「四太」梁安琪多年來投資物業，主要係收租，直至兩年前成立地產公司尚嘉控股，就開始涉獵住宅，頭炮係灣仔單幢樓項目「壹嘉」，傳聞本星期開放現樓示範單位，負責呢個項目嘅尚嘉行政總裁吳士元，離開恒隆（101）後，起碼7年冇賣樓，今年初向舊同事Alice Ting招手，再拍住賣樓。
溫書讀熟新例
吳士元早於2010年中離開恒隆，佢離開之前，恒隆係講緊賣君臨天下同浪澄灣嘅貨尾單位，所以呢，吳士元對上一次揸旗推全新盤應該有10年以上，莫過話市場變化大，成個孖屐唔同晒，淨係2013年實施《一手住宅物業銷售條例》，吳生都要溫吓書先掂。
吳士元都話，今次賣樓前要讀熟新例，新例限制多，佢都唔敢事前講太多。不過佢就有搵舊同事幫手，以前喺恒隆合作開嘅Alice Ting，喺恒隆工作超過廿年，早幾年離開咗恒隆，佢今年初就搵對方加盟幫手負責賣樓。
至於老闆娘四太會否粉墨登場，首次落場sell盤呢？吳士元講笑咁話，希望可以拉埋四太落水。不過，華華聽聞，四太目前喺歐洲旅行，可能要下星期先至返港，或者到時忽然即興走去介紹示範單位都未定，以前四太睇盤掃貨就多，家陣調轉賣樓，真係要訪問下佢先得呀。
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk