吳婉芳愛駒「喜蓮獎星」係人都知好厲害，今季連奪董事盃及女皇銀禧紀念盃兩項國際一級賽，可惜此駒早前曾受傷，評分亦太高冇合適賽程，已提早唞暑。
好在「喜蓮」系尚有另一匹惡馬「喜蓮彩星」，估計今季仍會再戰，凍齡美人吳婉芳隨時又可拉頭馬。
現評101分之「喜蓮彩星」係去年法國2400米一級賽巴黎大賽冠軍，級數夠晒高，來港後近仗一直由韋達打理，並喺皇太后紀念盃跑第二，只不敵「鷹雄」。
「喜蓮彩星」陣上經常內閃難策，唔少馬迷覺得韋達騎牠唔夠狠，直路衝上時，韋達往往顧得修正隻馬內閃，就顧唔到逼出佢嘅後勁，令韋達飽受批評。
好嘞，「喜蓮彩星」本月20日已飛起韋達，由潘頓接手試閘，到剛周六再由潘頓跳一課，意味韋達已喪失「喜蓮彩星」帥印。
隻馬最有可能報爭7月9日上限105分之二班田草2000米，如果到時真係由潘頓操刀並贏埋，韋達唔心酸就假咯！