效力上海上港嘅巴西中場球星奧斯卡杜斯山度士，喺上個星期日作客廣州富力嘅中超聯賽因為上半場兩次將皮球踢到對方球員身上而引發球員大規模衝突，雖然佢賽後否認自己唔尊重對手，不過喺上星期四仍然被中國足協指奧斯卡「以非道德方式侵犯他人」，重罰佢停賽八場兼四萬蚊人仔。
除咗奧斯卡之外，上港嘅傅歡、富力嘅陳志釗及李提香，亦分別被罰停賽5至7場，以及被罰款2萬5千至3萬5千人仔不等。另外，上港同富力亦都要被罰款。
唔少網民都認同中國足協今次判罰，例如新浪用戶lq5pb7gr6z就話：「殺一儆百，看看誰還敢無視體育精神，暴力球場！點贊！」用戶3313858197都話：「罰得好！就該治治這些號稱大牌外援那些臭毛病，也不看看這是哪」而微博用戶生有所思更留言話:「上港記得也把工資停了」不過，都有網民唔理解中國足協判罰準則係乜，Liddy話：「處罰是應該的，只是想知道這個八場的依據是甚麼」
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk