千呼萬喚始出來，官媒新華社終於公佈，國家主席習近平嘅訪港日子，換言之市民喺6月29日至7月1日呢幾日，如非必要都唔好去港島區嘞，屆時肯定因為要為習大大車隊全面封路，肯肯定會因為大塞車而竧𣉢！據聞中國第一夫人彭麗媛（彭麻麻）都會隨行，擔任此行嘅親善大使，消息指佢屆時會落區到老人院探訪，話唔定期間同老友記一齊唱歌仔㗎噃！
揀定靚衫訪老人院
其實本身係著名歌唱家嘅彭麗媛，自從做咗中國第一夫人後，已經好少公開表演。政界流傳彭麗媛為咗呢次訪港行，已經一早揀定衫，希望以最佳形象示人，皆因第一夫人此行肩負軟銷重任，喺習大大向港人發放不容港獨等硬姿態之時，佢就與民同樂凸顯親民關愛之情。
當然啦，所有落區行程，都係預先安排好，確保唔會有任何差池或令領導人尷尬嘅場面出現，而除咗正常如閱兵、文藝晚會同宣誓就職等活動外，據知第一夫人極有可能探訪老人院或學校，有心水清人士話喎，同公公婆婆打成一片嘅方法，不外乎係唱吓歌，彭麗媛屆時極有可能再開金口，冧吓一班老友記都未定㗎！
2014年澳門回歸15年，習大大都攜同彭麗媛訪澳出席慶祝儀式，今次係佢首度同夫人來港，據知唔少建制政團對呢位「親善大使」爭崩頭，爭相邀約出席活動，唔知最後有邊啲團體，獲得第一夫人青睞呢？
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk