練馬師鄭俊偉只欠兩Win便夠16場頭馬達標，表面上形勢唔太凶險，但剩番六次賽事咁大把，有時黑起上嚟唔贏就唔贏，所以冇得你鬆懈。
今期（25日）沙田日馬鄭俊偉就醒目嘞，第一場五班1400米之「幸運坊」，19戰不勝處女馬，想出頭仲可以有乜辦法呢？咪就係找來雷神莫雷拉初次執韁幫手囉！今朝呢對騎練亦有動靜，鄭俊偉在機坪mark實雷神，對他指手畫腳，似在講解「幸運坊」搏殺戰略，而雷神則仔細聆聽，態度認真。
「幸運坊」跑至6歲不贏，當然不是甚麼好貨色，但此駒過去長期由湯智傑、杜利萊之流主轡，冇乜好手騎過。本身大前仗仍於同程1400米入Ｑ，埋門試閘又跑第三，可見近況不差。今次突然初配雷神兼初戴眼罩，可能有驚喜演出未定。