國際乒聯世界巡迴賽嘅其中一站中國公開賽，𠵱家喺成都打得如火如荼，噚日上演第二日賽事；港乒代表杜凱琹/李皓晴喺女雙四強出局，但由於賽事不設季軍戰，港隊繼杜凱琹喺U21女單攞到一面銅牌後，再添一銅。
杜凱琹/李皓晴噚日喺女雙八強，對住新加坡組合周一涵/林葉。港隊呢支世界排名第六嘅組合毫不手軟，以11:5、11:8、11:6，直落三局擊敗對手。佢哋晉級後對住新科世錦賽女雙冠軍、中國組合丁寧/劉詩雯就無咁順利喇，最後以局數0:3落敗，但都獲得銅牌。另一港將黃鎮廷就喺男單16強迎戰日本球手松平健太，結果直落四局贏波晉級，八強再遇日本球手，鬥吉田雅己。男雙方面，黃鎮廷就拍住何鈞傑，喺八強鬥中國組合樊振東/許昕，對手貴為新科世錦賽冠軍，黃何配先贏一局12:10，可惜之後連輸三局出局。