立法會呢個是非地，不嬲都係山水有相逢，所以做人做事都千祈唔好去到太盡。話說日前紅磡有唐樓冧露台，好彩冇人命傷亡。身為代議士嘅就極之關心，當中政界元秋民建聯蔣麗芸一馬當先，即刻喺噚日嘅內會提出，要喺下星期三（28號）嘅立法會會議提出急切口頭質詢。
以前民主派一話要提急切質詢，建制派睇都唔睇就反對，大家估吓今次元秋闖關會點？
元秋講嘢不嬲都聲大大，今次佢仲唔大條道理？元秋一嚟就拋書包，話全港有6,000幢樓齡50年以上嘅舊樓，當中2,000幾幢都係失修嘅，呢啲咁嘅「城中炸彈」令市民相當擔心，加上雨季來臨，一定要急切質詢問個究竟。
小麗盼建制勿再政治化
同屬九西嘅無政黨劉小麗一舉手，八方就充滿期待，諗住睇吓佢點駁元秋。點知劉小麗第一句就話贊成元秋！跟住小麗話九西的確好多舊樓，有需要叫政府交代吓嚟緊點樣處理。
小麗仲話，一直以嚟，每當民主派提急切質詢，建制派就好多理由反對，譬如反對打尖等，佢唔會趁機報仇，因為今次件事涉及市民安全，亦希望將來建制派唔好再咁政治化。
之後唔單止民主黨尹兆堅，連又係九西嘅無政黨毛孟靜都表態贊成元秋，Miss Mo仲講明佢係對事不對人。呢啲就係真正嘅對事不對人喇，以德報怨。不過講到尾，急切質詢係要立法會主席批嘅，睇往績，梁君彥一於少理，係咪都唔批呢，今次即管等元秋感受一下被梁君彥否決嘅滋味啦！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk