草蜢成員蘇志威名下由鄭俊偉訓練的4歲馬「駿王」，本月11日首次在港出賽，角逐三班泥地1200米，結果大包尾輸27.75馬位，賽後蘇志威和太太劉小慧立即飛奔到馬匹解鞍處，近距離觀察牠，擔心牠是否跑傷，好彩最後證實冇事。
「駿王」小休後這天由杜利萊策騎，參試沙田第二組1200米泥閘，蘇志威夫婦及幾位朋友到場探班，很緊張這匹愛駒的進度。「駿王」除下防沙眼罩出試，沿途走勢比前暢順，大步搶放帶頭跑，最終只不敵雷神莫雷拉座騎「估惑」，以第二名過終點，表現似乎有點進步。
天氣炎熱下，劉小慧身穿白色薄長Ｔ恤，着短褲晒大髀，「駿王」試閘前，劉小慧對住此駒猛說：「乖仔！乖仔！」盡顯愛錫之情。鄭俊偉全程陪伴蘇威夫婦，一班人先在機坪睇馬，跟住一齊行去烽火台睇試閘，再返回機坪接馬，杜利萊落馬後更細心向馬主講解該駒的最新情況。
蘇老闆說：「『駿王』今次除下眼包(防沙眼罩)，似乎對牠更好，馬仔sharp過上次，表現好啲。我希望牠跑多一場才歇暑，但一切聽從練馬師部署。」
劉小慧說：「我們視『駿王』為兒子，牠是一個小朋友，上仗大敗可能是牠用行動表達不喜歡戴防沙眼罩，牠在美國跑開左轉跑道，同香港相反方向，上仗初出之前牠已有年幾冇跑，需要較長時間適應，最緊要牠開心健康。」