本周三晚（21日）快活谷夜馬，2013/14年度香港冠軍騎師，34歲澳洲籍的潘頓第五場勝出沈集成馬房「晚風」，奪得馬拉華度賽馬會挑戰盃後，準備出席頒獎儀式之際，向催促他行快兩步的禮儀小姐發脾氣爆粗，結果被馬會判罰十萬元。
呢件事惹起公眾關注，馬會官方公佈，只話佢確曾對該禮儀小姐用威嚇性用語，而現場片段大家聽得唔清楚，咁究竟當時潘頓講咗乜嘢粗口呢？
從內部人士得悉，並根據當時目擊證人重組案情，原來禮儀小姐一句「Can you hurry up？」辣㷫潘頓，跟住潘頓就說「If you say again，i will fxxking knock you down！」就係咁，潘頓大概兩秒的「發言」，就價值10萬元了。
被鬧的禮儀小姐年約廿多歲，身材高挑，當晚負責引領潘頓和沈集成到頒獎台。據了解，禮儀小姐係part-time性質，賽馬日先返工，負責賽日接待馬會董事、嘉賓，盃賽頒獎時引領勝出馬騎練、馬主和嘉賓等進場和離場，通常在馬匹亮相圈及廂房工作，唔少禮儀小姐由model公司向馬會推薦。
潘頓當晚講粗口時，賽事執行部總監黎達理企喺附近，目擊成件事，於是他立即到馬場影視部，要求翻看有關影片，並清楚聽到潘頓爆粗，遂向競賽董事小組「篤出」潘頓，將影片轉交小組處理，小組睇完片段覺得事態嚴重，直至跑完最尾第八場，立即要求潘頓留低展開研訊，研訊歷時約45分鐘之久。
事發至今潘頓及馬會都沒有接受訪問，但潘頓這天(23日)如常現身沙田馬場操馬，今朝他更策「良才」勝出第一組試閘，但第二組試閘座騎「好心腸」跑完受傷拉停，該駒情況令人擔心。