國家主席習近平下周訪港出席香港回歸20周年活動，原本領導人訪港，按慣例唔會見民主派人士，但噚日政圈傳出，中央考慮仿效張德江訪港做法，安排民主派立法會議員同習見面。八方問過民主黨立會議員，究竟係咪真有其事？佢話自己聽過兩個版本：第一個版本係習同民主派只有機會同場食飯，唔會有直接接觸；第二個版本就係13名民主派議員會喺食飯前出席酒會，有機會同習對話，仲話民主黨有4個「配額」，其他仲有公民黨等議員。
不過呢個民主黨立會議員話，到噚日都冇任何正式官方消息，話民主派議員可以同習見面，而且佢個人相信冇得見機會大，因為好多人唔想民主派喺習面前插佢哋搞亂香港。公民黨黨魁楊岳橋就同八方講，至今未收到邀請同習會面，如果收邀請亦要同公民黨執委會傾，若同意佢出席會面，佢就會反映港人對一國兩制憂慮，希望北京重啟政改同唔好再干預香港。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk