又到學期尾，係時候表揚吓過去一年嘅好老師。噚日舉行咗行政長官卓越教學獎頒獎典禮，有32位老師分別拎到卓越教學獎同嘉許獎，肯定佢哋喺藝術教育、科學教育、訓育及輔導三個範疇嘅教學表現。
嚟自基督教粉嶺神召會小學嘅馮惠敏老師，拎到藝術教育學習領域嘅卓越教學獎。佢主張將藝術融入生活，好似帶啲學生去粉嶺龍躍頭文物徑寫生，睇吓中國建築特色。又有個學生考試成日交白卷，經常都俾人否定，馮老師就幫佢搞咗個紙黏土展覽，畀同學睇到佢另一面，肯定佢喺藝術方面嘅天份。
嗇色園主辦可譽中學暨可譽小學的施瑪恩老師，喺科技教育學習領域拎到卓越教學獎。佢為小三到中六嘅學生設計咗「一條龍」嘅生物科技課程。學生唔使坐定定聽書，仲有好多實驗玩，好似種細菌、驗DNA咁。佢話自主學習令學生自信心同表達能力都有進步，仲會自己發掘實驗㖭！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk