曼聯班後衞過去一星期喜事重重，先係菲爾鍾斯上星期五結婚，之後到新兵域陀連迪路夫求婚成功，而基斯史摩寧就喺周三同被譽為「曼聯最索WAGs」嘅女友曲姬拉埋天窗。
做職業球員有大半年時間要周圍去唔同地方踢波，莫講話結婚，陪另一半嘅時間都唔多，所以休季期間係球員揀結婚日子嘅好選擇，加上下年有世盃決賽周上演，所以唔少球星都趁今年夏天去拉埋天窗，下星期就到巴塞隆拿球王美斯小登科。
意國行婚禮南半球饗客
講番曼聯先，史摩寧同曲姬喺意大利舉行婚禮，隊長朗尼當然要嚟捧場啦，佢仲帶埋老婆高蓮嚟。左閘勞基梳爾同埋上星期結婚嘅菲爾鍾斯都有嚟，清一色係英格蘭球員。以前踢曼聯、家陣效力阿仙奴嘅前鋒韋碧克都有到場，一齊飲番杯。
史摩寧同曲姬拍咗好耐拖，而曲姬一直被視為曼聯嘅最索WAGs。舊年史摩寧帶曲姬去峇里度假，同埋求婚，趁今年暑假冇大賽踢，就行禮結婚。史摩寧呢日化身白馬王子，着上一身白色西裝，而女主角曲姬就着白色長裙，高貴得嚟又性感，從側邊仲露晒「南半球」，到場嘉賓真係大飽眼福。
連迪路夫求婚成功
除咗史摩寧，喺今夏加盟曼聯嘅域陀連迪路夫，亦都有着落。呢位瑞典守將喺今夏真係順風順水，先係事業上有新發展，離開葡超嘅賓菲加轉投曼聯，愛情路上亦好得意，剛剛向女友瑪查（Maja Nilsson）求婚成功，而瑪查亦喺自己社交網站上大晒訂婚戒指！
瑪查係連迪路夫嘅跟得女友，以前連迪路夫踢賓菲加，佢都成日着波衫入場睇男友踢波。連迪路夫加盟曼聯，瑪查亦跟住男友去曼市體測同簽約。連迪路夫跳糟曼聯後，呢排就帶咗瑪查去馬爾代夫度假，而瑪查嘅身份由女友變成未婚妻！瑪查喺社交網站狂放戒指相，一張係佢喺泳池度影，舉起拳頭，向鏡頭晒戒指。
