兜兜轉轉，埃及翼鋒穆罕默德沙拿又返到英超，以破利物浦球會費轉會費紀錄3,900萬鎊（約3.9億港元）加盟紅軍，仲搶埋羅拔圖法明奴件11號波衫，法明奴就轉着9號……乜話？9號！係呀，係受咗「詛咒」嘅「利物浦9號」，今鋪真係唔知恭唔恭起紅軍好嘞。
沙拿來投搶走11號球衣
紅軍簽沙拿之前，已經由車路士簽入啱啱帶領英格蘭U20贏得世青盃嘅年輕前鋒蘇蘭基，新球季有呢兩名前「車手」，加埋菲臘比古天奴、羅拔圖法明奴同沙迪奧文尼，火力都咪話唔得人驚。不過紅軍最怕都係遇着鐵桶陣，𠵱家有埋沙拿，到時咬唔入都多個突破力強嘅員可以靠個人能力撕破對手防線。不過，高路普仲未打算喺轉會市場收得手，為改善後防，有意搵多個左後衞。
至於要轉做9號仔嘅法明奴，就自求多福嘞，事關喺利物浦孭過呢個number嘅都冇乜好下場（見附表），之前四個9號仔夾埋踢咗112場入得17球！不過球迷最關心都係買咗佢新球季件11號波衫咁點呢？利物浦就話可以寄件衫番球會，法明奴就會喺件衫度親筆簽名，都算係咁。