社創企業唔止要賺錢，仲講求共享價值，解決社會問題。其中社企項目「共廚家作」已經同5間食肆合作，喺非繁忙時段騰空廚房，畀基層人士整嘢食賣，目前有16人參加咗，一共研發超過100款新美食喇。參加者除咗賺到錢，又可以提高食肆競爭力。
呢個初創項目獲社創基金1年資助大約40萬元，運作咗9個月已經收支平衡。社創基金由2015年至今收到429宗申請，資助咗61個項目，包括「網．想．正」製作短片簡介職業同埋協助視障人士嘅「觸感──聽覺」同步系統，用咗大約4,000萬元。主席張仁良話，目標3年資助100項目，幫3萬名弱勢社群，相信唔難達標。
目標開拓銀髮市場
社創基金2012年獲政府獎券基金撥款5億元成立，𠵱家都係用咗近1億元，難怪張仁良話唔驚唔夠錢，係驚唔夠好project。佢話過去唔少申請者提交嘅idea未成熟，項目唔止要創新，仲要有social impact（社會影響），連結科技應用達致「雙贏」。
張仁良又話，未來都會放眼銀髮市場，仲透露候任勞福局局長羅致光都好buy社創概念，遲啲仲會同科技園公司合作，搞搞樂齡科技。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk