戇星議員秘密到地球考察，巧遇強力政府為了七十五歲阿婆賣一蚊紙皮又拉又鎖兼充公其貨品及搵食工具，靈光一閃，人棄我取，回戇星後於其立法會提出以下動議：
有鑒於戇星生態跟地球極為相近，同樣：1，阿婆為患；2，滿街紙皮；以及3，老年人醫療開支節節上升。經本人暨超級智囊團窮思極想，度出了一條絕世好橋，可以一次過──請注意，係一次過，唔係一次性──解決以上三個本星的嚴重問題，那就是：訓練阿婆組成執紙皮隊。
首先，相關部門查找出人口中合資格的相關人士，該人士當然必須要是阿婆，而該阿婆的體能又足以應付日常的執紙皮工作；然後，各地區委任負責人組織該區阿婆，加以訓練，然後分派到該區各處執紙皮，阿婆將所執拾的紙皮交回負責人，負責人則按紙皮量分發相應的紙皮錢予阿婆。最重要的是，此執紙皮項目無標準工時又無最低工資，所有阿婆均屬自願參加，多勞多得。
試想，大家如果唔死，始終都有一日會變成阿婆，須知道，變成阿婆並不等於對社會全無貢獻，尚有心有力的阿婆們，以一己剩餘之力發熱發光去為人民服務，單單聽起上來便已夠觸動人心！此外，經濟繁榮如戇星，貨如輪轉必然衍生出滿街紙皮，影響市容，每天派一大隊阿婆上街執紙皮，很快我們就會得到零紙皮戇星的美譽。
查實，這個執紙皮項目能有效提高本星GDP。表面上，阿婆執紙皮所涉及的金額雖小，但其負責人及負責人的負責人、其訓練員及訓練員的訓練員諸如此類則能提供大量高薪工作，有助大大提高本星GDP；重中之重則是，阿婆日日去執紙皮，等於由朝到晚都在做運動，一個人成日做運動，身體自然好，身體好自然無病無痛，無病無痛自然不用看醫生，蝴蝶效應之下，本星的老年人醫療費用便自然下降。這邊有錢入，那邊又出少了錢，一來一回，這條數又要搵幾個委員會及顧問團才計得掂，哈哈哈……一舉三得，得咗！
（編註：唐顧「風月談」專欄本周暫停。）
作者：蔡沅芹