昨晚（22日）嘅谷草之戰一直相安無事，有幸並冇發生咩大意外，不過相信前冠軍騎師潘頓就唔係咁諗，本來佢賽後應該抱住興高采烈嘅心態返屋企，皆因佢喺第五場就幫咗沈集成馬房嘅「晚風」捧走馬拉華度賽馬會挑戰盃。
不過佢就途中做咗一件讓人感不齒嘅事，事緣佢覆完磅步往頒獎台嘅時候，因為同沈集成傾多兩句而放咗慢腳步，旁邊嘅禮儀小姐免其他在席嘅嘉賓守候多時，所以催促佢加快步伐。點知潘頓因此大發脾氣，更向呢位小姐爆粗，內容更係威嚇性嘅用語，而唔少馬迷都好奇潘頓究竟講過咩威嚇性嘅用語，據知成句粗口，除咗聽完有令人打冷震嘅用詞外，仲牽涉攻擊性用詞。
所以競賽小組就收到嚟自馬會賽事執行部總監黎達理嘅投訴，指潘頓違反賽事規例第155（5）條加上多次干犯相關條例，所以最終重判罰佢十萬元。
賽後唔少馬迷認為潘頓人格有問題，並指出：「侮辱女性呢種冇風度嘅行為，被罰十萬係好恰當。」，而亦有馬迷認為：「應該唔係罰錢，而要潘頓向禮儀小姐道歉。」。
不過，有少部分馬迷就撐潘頓：「跑完場馬返嚟，大汗耷細汗，攰嘛，咪慢慢行返嚟囉。又唔係捧咩大盃，條女又喺度咿咿哦哦，煩住晒，咪少佢兩句囉。唔覺潘頓有咩做錯，人之常情。」
繼「文藝學家」一事之後，現時又出現爆粗事件，呢期最出位人物真係非潘頓莫屬。