近期政圈都熱論，中聯辦其中一位副主任譚鐵牛不可小覷，身為科學家嘅佢成功以創科做牌頭，殺入各大傳統名校交流，形象工程做到足，未來仕途一片光明。估唔到呢位鐵牛兄，最近又有新猷，仲視察保育同重建項目，其實關佢乜事？大家真係唔知，但中西區乳鴿許智峯就唔多like，覺得西環唔應該參與《基本法》規定外嘅香港市務，擺明會繼續追殺。
中聯辦近期對譚鐵牛嘅足迹，都報道得巨細無遺，不時喺網站圖文並茂，之前就不停報道佢走訪聖保祿學校同男拔萃，噚日又上載圖文，話譚鐵牛喺20日、即係星期二應邀到訪市建局，同主席蘇慶和同行政總裁韋志成等人會面，考察中區街市保育活化同卑利街及嘉咸街重建項目等，大讚市建局秉持先進重建理念、竭力克服困難，其間仲同「肉類分割技術員」搭膊頭傾偈㖭！
鐵牛殺入中西區，惹嚟白鴿黨當區議員許智峯高度關注，批評市建局做法離譜，一嚟佢跟進中環街市保育咁多年，仲要身兼區議員同立法會議員，多年嚟都未見過市建局高層帶隊參觀，批評市建局聯同西環如此connect係極不恰當，指西環唔應該參與《基本法》規定以外嘅香港內部事務，明顯帶頭破壞一國兩制，「巿建局做得好唔好，又關中聯辦咩事？」佢話今次開咗極壞嘅先例，促市建局交代，表明不容西環治港恒常化。
市建局：一般性安排
市建局發言人就話，呢個係一般性嘅交流參觀，了解市建局工作，仲話呢次到訪係由中聯辦提出、市建局作出安排，過往市建局亦曾接待不同團體、機構、學校、國內或海外代表團參觀。但西環明明話係應邀到訪喎，咁到底係邊一方面講大話呢？
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk