即將卸任嘅食物及衞生局局長高永文噚日搞咗場傳媒茶敍，記者行家都祝佢卸任後事事順景。佢仲特登喺聚會前大耍冧功，多謝佢嘅政治助理陳凱欣（Rebecca）好幫到手，甚至有人同佢講，有事情願搵Rebecca都唔搵佢呀！
讚政助得力 副局能壓場
民望高話，Rebecca呢幾年由立法會到區議會，游說工作等等嘅工夫都做到足，不單提升問責官員嘅政治敏感，仲令食衞局「有一個比較闊嘅雷達」處理問題咁話。佢又話，Rebecca好做到嘢、分到憂，有啲人直頭當面話，以後情願搵Rebecca都唔搵佢喎﹗講到呢度，佢哋兩個好有默契咁交換一下眼神。
民望高都冇忽略副局長陳肇始（Sophia）㗎，除咗祝佢升職後事事順利，話唔認為護理學系出身嘅佢壓唔到場，會全力支持佢。佢仲話卸任後做番醫生，但幾時開始睇症就唔肯講。
其實Rebecca不論線上線下都好努力處理問題，話說醫學界立會議員陳沛然喺fb發帖，話高喺立會唔肯正面回應佢嘅質詢，Rebecca立即留言話，唔可以只憑3分鐘片段就斷章取義話高永文冇答問題，仲同其他醫生大打口水戰，認真盡力。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk