唔通元朗區對於政制局嚟講，八字好鬼夾？無論梁振英或林鄭班子，政制及內地事務局嘅局長同副局長，都有一位嚟自元朗區同一間學校，表明同林鄭步伐唔一致，即將離開熱廚房嘅現屆政制局局長譚志源，畢業於新界鄉議局元朗區中學，今年就喺鄉議局新春團拜，同女狀元小師妹合照。
雖然接任譚志源嘅候任政制局局長聶德權喺觀塘瑪利諾書院畢業，唔係該中學出品，但盛傳任政制局副局長嘅運輸及房屋局副秘書長陳帥夫，卻同樣係新界鄉議局元朗區中學舊生。此校校友會刊物報道過，陳帥夫喺出席母校講座時提及從政以來最深刻嘅經歷，就係911當日陪同時任特首出訪美國，除咗近距離目睹現場狀況，亦驚嘆香港喺外國元首心目中幾咁重要，因為襲擊事件稍為安頓就第一時間獲接見。唔知未來嘅政制局政助，會唔會咁橋都係陳帥夫師弟呢？
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk