習大大之前開口埋口講足球夢，日前喺哈薩克同俄羅斯總統普京（右）見面，點知佢一班代表團成員竟然遲大到，得番習大大一人對住普京七人，普京仲寸習大大係孤獨戰士㖭，搞到習大大要以笑遮醜。嗱，習大大今次腦筋就轉得唔夠快嘞，食住呢排俄羅斯主辦洲際國家盃嘅勢，習大大梗係要回應番普京一句：「我可以好似美斯咁一扭七。」
唔知係唔係面懵呢個原因，習大大就冇跟普京去聖彼得堡睇洲際盃揭幕戰，呢場波俄羅斯就好生性，以2:0擊敗新西蘭，普京仲睇到拍晒手掌。不過睇住為明年世界盃興建嘅新聖彼得堡球場，六萬幾個座位都係七、八成滿，真係為普京擔心。
其實呢十幾廿年，搞咩國際大賽都係蝕大本，好似中國搞北京奧運，總投資去到三千幾億人仔，門票、直播收益就當然搵唔番，𠵱家仲要養住水立方、鳥巢等大白象工程。俄羅斯又唔係未瀨過嘢，投資五百億美金（約3,900億港元）搞索契冬奧，又係蝕到喊。以為搞足球一定有作為？唔好意思，巴西上屆搞世界盃一樣蝕，係抽佣嘅國際足協有得賺。
俄羅斯主辦世界盃，其實都不斷傳出超支新聞，好似洲際盃揭幕戰嘅新聖彼得堡球場，由2007年已經開始起，竟然搞到洲際盃開波前幾個月先叫做落成到，埋單就用咗11億美金（約85.8億港元），最大鑊係其餘12個球場竟然只有兩個係原有球場翻新，即係話要起10個新球場，仲要遍佈加里寧格勒、葉卡捷琳堡等二線城市，真係幾趕客。
國際足協就懶得理主辦國死活，仲建議2026年擴大到48隊，即係球場要多啲，食得起咁大型足球比賽嘅國家更加少，而且仲有咁大蝕本風險，相信冇乜國家敢搞。
文：牽牛