民協前晚透過內部初選推薦馮檢基參加九西補選，其後喺facebook公佈結果，指最終仍然要中委會確認，阿基先可以代表民協披甲，又指今次補選係泛民同建制兩陣對決，呼籲民主派盡快啟動初選協調機制。
點知個po一出，網民就留言大鬧阿基戀棧權力。有網民諷刺：「恭喜民協成功交棒，世代交接。」但其實係「交畀上一代」；又批評阿基指：「我只係認為你上次立法會選舉的安排就是民主派千古罪人。」
「民協facebook小編」最初同網民唇槍舌劍，但就以第一身「我」反擊，例如「我戀棧權位，12年不會中委會通過我在九西選（8成當選），我却（卻）堅持選超級。16年也不返回九西！」等，唔少網民質疑係阿基本人直接回應，疑似阿基好不忿，續同網民駁火：「我留底（低），你話我戀棧，我堅持不戀棧，你話我不忠不義！你最叻，公字都贏。」之後越嚟越多網民加入戰團，喺政界掀起一場網絡花生戰！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk