【香港20年】
【本報訊】回歸前後香港樂壇被翻版碟蠶食殘存，面對內地13億人的龐大市場，歌手紛紛北上賺人仔，自認食老本的湯寶如認為現在當新人最慘。曾為多位巨星填詞的陳少琪見證樂壇20年變遷，認為回歸後樂壇失去聚光燈。曾是金牌經理人的李進，談樂壇青黃不接，認為是整個生態在改變，但不認為歌手北上是唯一出路。
記者：皓 騫 小 米
攝影：沈健程 陳慧安 馮 峰
現年45歲的湯寶如，當年跟黎瑞恩、劉小慧和王馨平被封為「寶麗金四小花」，人人稱呼她做「湯記」。出道25年的她，早已不活躍於香港樂壇，轉為北上掘金。對於香港樂壇走向衰落，湯記慨嘆：「自從有download（下載）之後，所有市場都萎縮，製作人同唱片公司生存唔到，我哋做音樂變咗出單曲睇點擊，自己初初都唔慣！」
陳少琪：港已非亞洲中心
市場萎縮，很多歌手沒有機會出唱片，湯記2001年返內地搵食：「我覺得受害係一班新人，老實講我係食老本，內地都係聽我嘅舊歌，中國市場真係好大，搵錢機會比香港大好多，講真香港有幾多個電視台，只要你肯上大陸，勤力啲可以搵多啲。」今年她自資60萬元出廣東話EP，「𠵱家買隻歌8蚊，飲杯檸檬茶都唔止，我諗住將大陸賺嘅錢回饋番香港朋友，𠵱家啲人買hi-fi碟，唔係唔買，只係要求高」。
而曾為達明一派、張國榮、梅艷芳等巨星寫歌的填詞人陳少琪，近年工作範圍拓展到內地，為2008年北京奧運、2010年上海世博寫宣傳歌，最近更成立黑芝麻文化娛樂。見證着時代變遷，他認為回歸後香港樂壇失去了聚光燈：「我入行時，香港嘅聚光燈範圍好強，成個亞洲都望住做中心，但當其他地方音樂崛起，各自做本土文化，佢哋唔會關注廣東歌！」
陳少琪認為以前是卡拉ok主宰創作：「究竟做歌係畀人聽定畀人唱？但20年過去，香港近年唔再係K歌。」雖然音樂多元化了，但市場卻萎縮，他說：「𠵱家視頻先行，音樂要用手段吸眼球，大家都要搵出路，自己好早北上，睇到回歸後成個舞台大好多，當時喺北京發覺內地少聽廣東歌，自己唔忿氣，喺冇任何收入保障下租屋搬上去慢慢做，𠵱家香港同內地都有公司，喺我嘅創作案子裏面，好鍾意用中港台朋友做交流，呢個先係大舞台嘅音樂生態。」
李進：北上非唯一出路
另一位於90年代叱咤一時，一手捧紅鄭秀文及黎明的金牌經理人李進，提到香港樂壇青黃不接，他嘆謂：「呢個問題出現好耐，因為成個生態都改變緊，當資訊世界咁爆炸，數碼世界咁深入民心，隨住生活方法改變，情緒同需求都跟住變！」他續謂：「80、90年代，音樂表演事業蓬勃係好多嘢形成，現階段唔係靠賣CD，成個生態鏈都唔同咗。藝人要把握到音樂消費者嘅要求，點解要鍾意你，要掌握到啲歌點樣可以產生共鳴。」
李進又指，發行部份都有問題，認為投資、發行及經理人公司的利益分配都要改變，「投資方要攞到應有回報，如果成日蝕錢，邊個會投資？」不過他不認為北上是唯一出路，又以歌手Susan Wong（黃翠珊）為例，指她的歌經常出現在歐洲網上電台，「歌手定位好緊要，唔一定要北上，內地係有13億市場，但內地歌手都未必打得開呢個市場，歌曲水準最緊要」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk