沙田馬場周日(25日)有項1400米國際三級賽精英盃上演，其中徐雨石馬房有兩駒列陣，分別係「一片光明」及「歷險家」。
通常跑親級際賽，無論華、外練馬師，都會將戰馬交俾騎功更有保證之外籍大師傅操刀，無非希望增強戰鬥力，但徐雨石卻反行其道。他透露「一片光明」將會配其徒弟見習騎師黃皓楠；「歷險家」則由黎海榮執韁。
亦由於見習騎師在級際賽依例是不獲讓磅，故黃皓楠的減七磅優惠，在「一片光明」身上未能派用場，頗為蝕底。對此徐雨石笑說：「有很多朋友問我，以見習生們的騎功，他們在級際賽面對外籍大師傅而不獲受讓磅，難免吃虧，為何仍作出一個大膽決定，搵皓楠跑『一片光明』呢？其實很簡單，因為我想給予他機會跑大賽。」
不過，就算冇皓楠仔的減七磅，「一片光明」負113磅上陣其實仍極輕鬆，此駒出名演出忠心，19戰得6冠5亞3季佳績，1400米亦贏過。三級賽向來利冷門輕磅馬，早前「永旺年年」便爆89倍Win，「一片光明」比「永旺年年」更穩定忠心，當然有機會捧盃。