雖然有基斯坦奴朗拿度參加，但感覺今屆洲際國家盃好似無聲無色咁開始，朋友間好少傾，網上討論區亦唔多人講。照計盒子台第一次攞到世盃轉播權，理應谷行洲際盃，準備嚟緊呢年吸客睇世盃，當然可能正因為係盒子台，所以洲際盃先至搞得無聲無色。
盒子台近一季真係好多波播，連冷門南美波都有，但就有時播有時唔播，好似英聯盃同英足盃咁，竟然冇決賽播；之前世青盃又係，播一陣又話唔播，之後又播，好難捉摸。盒子台大老闆百足咁多爪，搞東又搞西，資金方面可能七個蓋要冚九個煲，真係今日唔知聽日事。可能因為咁，盒子台都唔夠膽大事宣傳，亦可能根本冇咁多錢去宣傳，有錢不如儲起去租衞星仲好。
對於香港市場，一個足球大賽好唔好氣氛，極之在於電視台攞到轉播權之後點樣搞。小弟覺得史上最有氣氛，應該係1998年法國世盃。大台攞咗轉播權，全部波免費有得睇，有阿叔同阿叻講波，李克勤仲靠一首《球迷奇遇記》唱到街知巷聞。雖然法國世盃開波時間都麻麻，但勝在大台出錢出力，所以香港氣氛好好。之後2002年日韓世盃都唔錯，一來時間好，香港球迷唔使捱夜睇，二來有中國第一次打入世盃。雖然係收費台播，但畸寶都出盡力宣傳，搞晒睇波party。之後幾屆世盃以至歐國盃，香港好似都去唔番當年氣氛。
出年就係俄羅斯世盃，開波時間係好適合香港球迷去睇，同周末英超開波時間差唔多，同上屆巴西比，係有先天上優勢。不過，究竟盒子台明年今日會唔會仲係朝不保夕呢？盒子台又會拎到幾錢去宣傳呢？上星期三係世盃倒數一年，亦唔覺眼有乜大宣傳。當然，對於球迷嚟講，最緊要係有得睇，希望盒子台到時至少滿足到呢個至低限度要求啦。
文：咖喱