這晚（21日）谷草夜馬，同4字結下不解之緣，頭兩場由一對4號馬「泡泡達人」及「自由飛翔」勝出；到第三場四班1200米，騎練雷神莫雷拉、蔡約翰的4檔馬「勁皇子」大熱掄元，單Win及組合獨贏A1分別派22.5及16元。
「勁皇子」今場沿途守第三位，直路加速贏0.75馬位而回，其廐主蔡約翰近排幾乎日日有馬贏，當此駒今場由雷神季內第二次勝出後，呢位神級練者已追平由告東尼04至05年度所造的香港練馬師單季最佳成績（91Win），蔡約翰幾可肯定可刷新有關紀錄。而「勁皇子」一連5仗取2冠1季1殿，表現進步。
講番雷神，頭場佢騎吳定強馬房「高山威龍」勝後被貶第三，但第三場雷神隨即贏「勁皇子」補數，而史卓豐騎落重飛馬「獵狐者」後追第二，兩駒串成12倍啡燈Q，帶挈落飛黨在此條Ｑ身上贏咗約1,200萬元。三、四名分別為「幻影飛鷹」及「旅遊智者」，四重彩派二萬二千幾。