林鄭新班子喺噚日下午齊齊整整新登場，表明離開熱廚房嘅現屆幾位局長，無論係主動定迫不得已都好啦，噚日咁啱要留守立法會大樓回應質詢同辯論，八方現場見到佢哋，絲毫冇斯人獨憔悴嘅feel，離愁別緒亦唔多覺，反而各自大讚接班人好得，可能因為唔使再捱熱而好風騷，告別添馬之路，走得輕輕鬆鬆。
以民建聯身份加入政府，由副局長做起嘅商務及經濟發展局局長蘇錦樑，離開9年熱廚房之際，大讚新一屆團隊好有經驗；對於特首辦主任邱騰華會接棒做佢個位，蘇錦樑認為非常合適，「我都同佢好熟，亦都覺得佢好有能力，以前亦都接觸過一啲貿易嘅事」。離開政府會唔會依依不捨？蘇直指：「當然唔捨得啦！」佢早前已經話過卸任後會同太太去旅行，或者會重操律師本業。
同樣即將離開熱廚房嘅運房局局長張炳良，亦話自己十分認識接任運房局局長嘅機電署署長陳帆，因為喺鐵路工作方面，機電署係鐵路安全嘅規管者，「陳帆先生係一位非常能幹嘅工程師，亦都好有擔當，所以我對佢接任局長，係非常之有信心」。佢話每個局長除咗專業工作，都要面對政治問題，相信以陳帆嘅工作經驗，應可處理。
指聶德權「深慶得人」
至於話明同林鄭步伐不一致而求退嘅政制及內地事務局局長譚志源呢，連日已同各方友好惜別，佢噚日喺立法會被問到接班人聶德權時，盛讚對方曾任學生會會長，當時已經「好威」，1986年加入政府曾任駐京辦主任，非常了解內地事務，出任新聞處處長期間亦同佢陪過梁振英訪問內地，又參與過政改，非常有經驗，大讚聶德權「深慶得人」。唔知呢3位新局長，點睇前任嘅讚賞？
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk