堂堂名帥哥迪奧拿上季殺入英超加盟曼城執教，執教生涯首次食白果四大皆空。下季曼城要捲土重來，勢必大事增兵，據報已經同巴塞隆拿舊部丹尼爾傾掂數，將會同藍月簽約兩年。哥帥昔日同丹尼爾共事多年，贏盡大小錦標，不過上季佢搵過心腹哥迪奧巴禾加盟搞到一鑊粥，前車可鑒，今次都祝丹尼爾同哥迪奧拿好運咯。
巴禾慘成「黃大仙」
哥迪奧拿喺2008年接手執教巴塞，亦係當年夏天由西維爾收購丹尼爾過檔，兩個人合作第一季就贏盡西甲、西盃同歐聯。之後各散東西，哥帥教拜仁慕尼黑，再喺上季教曼城；現年34歲嘅丹尼爾喺上年離開巴塞轉投祖雲達斯，仍然有貨賣，助祖記贏本土雙料冠軍兼殺入歐聯決賽。
曼城喺今夏放走約滿嘅薩巴列達同沙格拿，哥迪奧拿認為右閘位置都係要搵個信得過嘅人，丹尼爾就啱晒。丹尼爾同祖記仲有一年合約，據報祖記原本希望向曼城收番500萬鎊轉會費，但丹尼爾就希望解約以自由身轉會，喺周一已經由佢經理人做代表同祖記傾，除咗曼城之外，有傳車路士亦有意向佢招手。
哥迪奧拿上季去咗曼城之後，踢走門將赫特，搵巴塞系嘅巴禾加盟。雖然巴禾當年加盟巴塞嘅時候，哥帥已經離隊，不過好大原因都係同聲同氣，有助哥帥建立威信。可惜巴禾嚟到英超，完全唔適應變「黃大仙」，出醜多過撲波，到季尾連正選都冇埋。如果丹尼爾真係加盟曼城，34歲人可唔可以適應英超真係好成疑問，你估咁多個伊巴咩。
祖記搵達美安替補
祖記方面，如果丹尼爾離隊，佢哋亦已經搵到接替人選，咁啱又係嚟自曼市，就係曼聯嘅意大利右後衞達美安。達美安效力曼聯兩年表現一般，上季喺摩連奴麾下，成季英超只係上陣18場。雖然摩佬唔想失去呢位後防球員，不過據報曼聯球會方面只要收到1,800萬鎊（約1.8億港元）轉會費報價，就會同意放人。