正在休假嘅特首梁振英，稍後又要飛咯！政府新聞處噚日公佈，689會喺星期日（25日）中午前往北京，主持翌日喺北京舉行嘅回歸20周年展覽開幕禮。呢次梁特上京唔係單拖，有6名問責官員隨行，包括盛傳7.1留任嘅財政司司長陳茂波、環境局局長黃錦星同創新及科技局局長楊偉雄，以及鐵定離開熱廚房嘅政制及內地事務局局長譚志源、食物及衞生局局長高永文同發展局局長馬紹祥。梁特離港期間由政務司司長張建宗署任特首，26日晚返港。
雖則梁特呢次一拖六北上，係威係勢，但八方相信外界焦點都落喺新貴、即係候任特首林鄭月娥身上。候任辦話林鄭會係周日赴京，同梁特一齊出席展覽開幕禮，同樣翌日晚返港，雖然只得候任特首辦主任陳國基隨行，但風頭肯定猶勝舊人。
自誇比董伯勤力
而臨別在即嘅689接受《東周刊》訪問時就自誇「5年特首生涯已交足功課，甚至超額完成」，意有所指自稱從來唔會「hea住做」，工作比有「7‧11」外號嘅前特首董建華更勤力，因為董生在位時仲未興手機，佢就24小時接電話處理突發事件喎。
而佢任內最銘記於心嘅係美國中情局前職員斯諾登潛匿香港，話事件反映香港高度自治，唔可以單純解讀為除咗國防外交之外全由香港自己管，一切要睇《基本法》原意。
佢聲稱放棄連任係為咗保護家庭，當時齊昕住院有傳媒去私家病房逐間房推門喎，透露齊昕情況大為好轉，已經係佢最大嘅回報。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk