香港特區政府同北京故宮簽訂秘密協議，喺西九文化區設立香港故宮文化博物館後，康文署為慶祝香港特區成立20周年，舉辦「萬壽載德——清宮帝后誕辰慶典展覽」，向故宮借出多達210組故宮博物院珍藏，包括康熙帝、乾隆帝母親崇慶皇太后、乾隆帝、嘉慶帝同慈禧太后慶祝萬壽嘅珍貴文物。
而《崇慶皇太后萬壽圖》係乾隆16年為母親崇慶皇太后賀60大壽嘅場景，文武群臣聚集京城，十餘里路張燈結綵、戲曲、雜技、舞蹈等，每卷長約25至29米，真實展現當時慶壽盛況。
原為賀壽 變祭奠物
其中，乾隆仍係皇子時，喺父皇雍正60歲大壽前兩年，以楷書寫成《如來陀羅尼經》準備賀禮，奈何雍正大壽前突然去世，乾隆其後將經冊作為父親去世百日嘅祭奠物。另有明清宮廷殿陛典禮，帝后御座所奏《中和韶樂》八音中既金屬樂器等。展覽將7月2日至10月9日於香港歷史博物館（展覽廳）舉行。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk