騎師柏寶早前請假返回澳洲一段日子，回防後在港跑了三次贏事，無任何頭馬進賬，再咁落去當然唔係辦法，好在練馬師蘇偉賢雪中送炭，今期(21日)快活谷夜馬，柏寶4匹座騎中，有三隻來自蘇偉賢，如果冇咗佢嘅支持，柏寶都真係幾大鑊。
柏寶自己亦無怠慢，今朝(20日)蘇偉賢腳踏風火輪電動車返馬房時，柏寶亦踩住單車，結伴與他一齊入倉睇馬，可謂有晒搏殺手影，明顯柏寶今次決心要做好蘇偉賢「影子主帥」這個角色。
這對騎練周三合作「皇帝誥令」、「豐利多」、「真好漢」三駒，其中當然以第四場四班1800米之「皇帝誥令」最值得重視。此馬今季7戰得3冠2亞2殿，由短途1200至中長途1800米都能交出好佳績，越跑越進步，今次唞足一個月才再戰，確保體力充沛。
「皇帝誥令」上仗因柏寶不在港而換潘頓入Ｑ，今次柏寶慶幸攞得番這匹心肝寶貝，他亦係唯一贏過呢匹馬的騎師，佢當然好緊張，力求再勝以保住帥權啦！