今時今日買個球星都要億億聲，續約又話十幾萬鎊周薪起標，英超球隊雖然每年收唔少轉播費，但都要搞到開源；好似阿仙奴咁，就宣佈同美國電影公司環球合作，以後兵工廠球星就會喺環球電影嘅宣傳片客串登場，第一套好大機會係月底上畫嘅《壞蛋獎門人3》。
其實球會同電影公司合作都唔係新嘢，曼聯搵錢一向積極，之前已經同霍士合作，前鋒朗尼、門將迪基亞等，已經喺《變種特攻︰天啟滅世戰》嘅宣傳片粉墨登場過，今次阿仙奴同環球合作已經唔係第一次，聯賽煞科戰對愛華頓，電影公司已經派成班壞蛋現身阿聯酋球場，兵工廠已經應承肯定有奧斯爾、阿歷斯山齊士等球星撐場拍之後嘅宣傳片，第一套相信係《壞蛋獎門人3》，如果一眾球星，甚至領隊雲格扮吓黃黚黚嘅壞蛋，就真係幾搞笑。
奧斯爾隨隊訪澳洲
講開阿仙奴，今夏佢哋就會東來，先後去澳洲同中國踢友賽，7月13同14號到訪悉尼，同FC悉尼與西悉尼流浪者友賽，德國中場奧斯爾冇份踢洲際盃，相信係友賽最大牌球星，佢就話自己未去過澳洲，好期待今次到訪悉尼之旅。