洲際盃周一進行最後一場首輪分組賽，以二線球員應戰嘅德國，喺索契對住亞洲冠軍澳洲，都一樣以3:2勝出，打開B組勝利之門。
德國教練路維今次洲際盃冇徵召湯馬士梅拿、曉姆斯等骨幹，希望俾一班二線球員上位，增添下年衞冕世界盃籌碼；只花5分鐘，利華古遜中場祖利安白蘭特右路傳中，慕遜加柏中場史甸度12碼點輕鬆射入，幫德國先開紀錄。不過之後德國有辛度華拿、哥列斯卡等連番失機，俾澳洲有反撲機會，中場湯洛積41分鐘一度追平，不過澳洲開心咗3分鐘，德國就由達斯拿射入12碼，以2:1領先半場。
換邊後，德國由哥列斯卡勁射入網，一度拋離至3:1，不過利華門將賓特尼奴派膠，甩手之下俾澳洲前鋒湯米祖歷門前執雞，拉近至2:3，雖然湯米祖歷有手球之嫌，不過經過視象裁判，入球仍然有效。德國以3:2險勝澳洲，同智利同得3分，不過得失球較差排B組第2。