馬會將AC米蘭「新保方」譯做基安盧基當拿隆馬相當蹺口，不過呢位18歲門將喺日前確定拒絕同A米續約，被指貪錢要走人，即刻有個好易記嘅新外號：「Dollar隆馬」。Dollar喺周日代表意大利出戰U21歐國盃分組賽，波就贏咗以2:0輕取丹麥U21，但比賽期間就俾人侮辱，有球迷將假錢撒向Dollar把守嘅龍門度。咁貪錢，𠵱家一地都係去執喇！
拉奧拿：佢家人受恐嚇
當拿隆馬唔肯同AC米蘭續約，呢個決定就令到A米球迷好不滿。隆馬有份代表意大利U21出戰U21歐洲國家盃，周日意大利進行C組首場分組賽鬥丹麥，相信係對隆馬懷恨在心嘅球迷趁機做嘢，喺比賽進行到35分鐘，有人將一大堆假一蚊美金紙幣撒向龍門一帶，一地都係錢擺明係衝住隆馬而嚟，搞到球證要暫停比賽，搵球僮幫手執番啲假錢先至再繼續比賽。喺看台上面，亦有人拉起寫住「Dollarumma」嘅橫額，好地地新保方就變成Dollar隆馬咯。
Dollar變成過街老鼠，被指貪錢要走人，外界普遍認為罪魁禍首係佢背後嘅萬惡根源——經理人拉奧拿。拉奧拿原定喺周日招開記招詳細交代事件，之後變咗接受傳媒訪問，話佢哋先係受害者，因為隆馬同佢屋企人之前都受到恐嚇，先決定拒續約。
A米總監否認出嗱渣招
拉奧拿話：「呢件事已經滲入暴力同恐嚇成份，睇嚟唔走都難解決。我哋做咗一個唔想做嘅決定，隆馬原本已經決心同AC米蘭續約，但同佢屋企人都受到侮辱同恐嚇，絕對唔可以用呢種手法去留住球員，最壞嘅情況係，佢喺未來一季都唔可以參加比賽。我願意將責任攬晒上身，我亦可以同大家講，我一直都冇同任何大球會傾過隆馬轉會事宜。」
拉奧拿似乎暗示AC米蘭焗當拿隆馬續約，但AC米蘭嘅行政總監法辛尼回應就話，從來冇恐嚇過隆馬，仲話只要隆馬改變主意，隨時歡迎同佢續約。