鷹君（041）疑似爭產風波發生後，身為貿發局主席嘅羅康瑞唔知係咪唔使爭，心情冇受家事影響，上個月仲帶考察團去泰國同越南，變身「學生哥」同泰國總理交流。
羅康瑞噚日同傳媒分享帶團趣事，話今次考察團係做實事嘅，去到泰國，唔預算見到國家領導人，點知意外獲官方安排見總理。唔知係咪泰國國家文化關係，羅康瑞話「佢哋（總理）坐高少少，我哋就好似學生排排坐喺到，要講嘢要企起身，去mic前先講得」。
坐位一高一低，初時羅康瑞都成頭問號，心諗「咁樣點對話呀」，仲以為總理同佢握個手就走人。但唔知係咪考察團誠意感動對方，最後總理逐個同團員握手、selfie埋先走。
講起以往一帶一路定位模糊，羅康瑞話希望搞咗多活動後，9月份「一帶一路高峯論壇」可以公佈一至兩個項目，畀大家睇到成績。
佢仲話自己齋帶團，唔投資，怕俾人話有利益衝突！但落台後就會諗下。點知有記者笑佢，落台後都可以有利益衝突，嚇得羅康瑞反問「要我過冷河幾耐？」仲自爆任期尚有兩年，大呻「真係慘！我聽日辭職啦……」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk