立法會政制事務委員會噚日開會傾下屆立法會選舉嘅選票設計係咪可以刪除候選人相片或者黨徽等，因為近年參選名單水蛇春咁長，上屆新東就有成22張名單，而呢款選票設計最多放到24張名單，所以要研究修改，但一眾議員似乎唔多buy！
民建聯劉國勳舉例話，如果工聯會何啟明同民協何啟明一齊直選，冇咗張相同黨徽，分分鐘搞錯仲影響選情；工聯會麥美娟加把口，話呢件事真係好困擾佢嘅黨友、即係現任勞工界議員何啟明，因為何試過着住工聯會件衫影相，傳媒刊登時都當咗民協何啟明噃。
民建聯蔣麗芸亦提及，黨友劉國勳同民主黨尹兆堅都係「圓碌碌」，好易撞樣，亦有女性候選人可能會P圖，所以選票應該保留足夠資訊畀選民投票時考慮，似乎呢個刪相兼刪黨徽建議未必過到關喎！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk