話咗會離開熱廚房嘅商務及經濟發展局局長蘇錦樑，最近已經清空政總office，離任前接受多間傳媒訪問大談感受，呢位民建聯成員2008年加入曾班子成為商經局副局長，上任冇耐被揭用卡片代替入息證明幫外傭向入境處申請續期留港工作，從此獲封「卡片蘇」。佢仲自爆談及港視發牌問題時一度哽咽，好在按住穴道先至冇流下馬尿。
話卸任後多搭港鐵
Greg回首當時，都話卡片事件處理得唔好，指嗰時覺得副局長薪酬係公開資料，可以用卡片當入息證明，加上國籍風波，令佢上咗寶貴一課。及至升呢局長，2013年港視不獲發牌時佢一度公開哽咽，政界議論紛紛，阿Greg話係諗起呢個決定影響多達300名港視員工嘅就業機會，自然有情緒流露，而佢嗰時已經按住自己穴道，冇喊出嚟，盡量克制情緒，「無論點樣我都係人」，重申佢喺行會支持發3個牌，最後亦有體現集體負責精神。阿Greg回應自由行湧港時曾指「坐地鐵時可能等多一班車」，佢冇回應此說係咪「離地」，只強調基層受惠於旅遊業帶來嘅就業機會，笑言卸任後會多啲搭港鐵，因為冇司機又唔鍾意揸車，覺得泊車好煩。
佢話喎，半年前已經考慮離開官場，但冇透露林鄭有冇邀請佢留任，亦唔相信特首梁振英曾經一如傳言，喺任期途中向北京提議炒佢魷魚。佢卸任後或會做番律師本業，仲透露有機構向佢挖角㖭！
到底如果想喊而要忍，阿Greg係按住邊個穴道而制止咗一場雷雨？八方問過中醫師彭明慧，佢估計當時阿Greg係按住自己手腕上嘅神門穴，或手腕對上兩吋嘅內關穴，指神門穴有安神大門嘅意思，按住可以放鬆情緒，對紓緩失眠都有幫助；按內關穴則可調和情緒，鎮靜神經，如紓緩嘔吐或暈船浪。一般喺穴位按兩至三分鐘都有紓緩情緒作用，而佢話當人按住穴位時，可能已經轉移注意力，所以放鬆咗情緒喎。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk