「我覺得自己有過度活躍症㗎，由細到大都坐唔定。」點解今年30歲嘅林顥伊、即係麗新集團主席林建岳嘅千金，咁樣話自己？「因為我彈琴唱歌跳舞游水騎馬滑雪乜都要學，成日要有刺激先至滿足！」又係噃，睇番顥伊（其實佢以前叫愛兒）少女照，確實各式活動相都有齊。佢細個原來想做歌星，點估到女大十八變，家陣幫爹哋打理家族生意？
過度活躍參加活動
對住過度活躍嘅學生，老師可以點？小學至中二讀女拔萃嘅顥伊笑笑口話，「好啲嘅咪讚你『活潑好動』囉」。佢話小一、二時上堂唔專心，成日撩同學傾偈；升中後好啲，集中課堂外先繼續發揮佢無窮無盡嘅精力，參加嘅活動數之不盡，運動場上極易搵到佢影蹤，同時又會參加音樂表演。
五兄弟姐妹中佢排第三，自覺個性較獨立；諗番兒時往事，顥伊不時嘻嘻笑，自爆一度諗住做歌星，「彈琴唱歌我都識，幾有天份㗎，想發展」，可能因為屋企有搞娛樂事業（爺爺林百欣曾經係亞視老闆），接觸得多就對做歌唱行業有憧憬，仲試過參加校內talent show做戲，「有時啲課外活動都係減壓方法」。
中二後到美國讀寄宿學校，like爆當地自由學習氣氛，佢之後先後獲港大工商管理學學士學位、英國BPP法學院之法律深造文憑同中大普通法法學碩士學位，家陣從商，亦搞多咗社區事務，除咗加入經民聯，亦成立非牟利組織Paws Hero爭取動物權益。佢自細都好鍾意狗，𠵱家養緊4隻，周末假期會帶佢哋去picnic或者逛吓提倡人狗同行嘅商場，覺得香港應該開放多啲空間畀寵物。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk