特首梁振英就快卸任，連日佢接受唔少友好傳媒採訪，為佢任內5年政績不斷唱好，作為梁御用網媒《港人講地》，又點少得為梁特宣傳？佢哋前晚上載咗條由政府新聞處前處長丘李賜恩講梁特嘅片，除咗為過去新聞多多嘅第一家庭洗底外，仲爆梁特有次帶住電筒去花園睇花花草草，俾住喺半山嘅前特首董建華見到，以為有賊入咗禮賓府，仲報埋警㖭！
第一家庭過去5年新聞多多，特別係梁特太太梁唐青儀同細女齊昕關係仲上晒報紙。
梁特瞓唔着去睇花
丘李賜恩喺《港人講地》條片入面話，其實梁特同兩個女關係不知幾好，話梁特有次同佢講，兩個女細個時晚晚洗頭，梁特就會親自為兩個女吹頭，一路吹一路傾偈，問吓功課點樣、與同學相處成點，丘太話梁特好開心，話可以從中了解子女情況，而丘太仲話，從呢件事可見梁特幾愛護子女同家庭喎。
丘太之後又爆料，話住喺半山嘅前特首董建華，有次天未光去露台做運動，忽然見到禮賓府花園有啲光閃吓閃吓「照田雞」咁，唔通有賊喺禮賓府？作為好市民嘅老董梗係報警！點知原來係梁特瞓唔着，又唔想騷擾人，於是自己半夜帶住電筒去禮賓府花園，睇佢自己種嘅花花草草，結果畀老董誤以為係賊！不過從呢件事睇到，原來老董同梁特都係鍾意天未光起身，唔怪得之佢兩個咁啱傾啦！
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk