「賽馬會無家者世界盃奧斯陸2017（香港區）」賽事噚日舉行頒獎禮，候任特首林鄭月娥出席主禮。幫手搞呢個活動嘅社區組織協會主任何喜華致辭時話，賽事舉行至今13年，但其實佢心底最希望係下年唔好再搞，意味香港再無露宿者。佢憶述2003年有官員同佢講，社會同政府要喺人喺谷底時幫一把，係責任嚟，而講呢番話嘅正係林鄭。可惜過去兩年，理想同現實漸行漸遠，望林鄭上場後可以改善。
林鄭自言好樂意出席無家者嘅活動，因為可以提醒佢社會有咩問題未解決。另一個吸引佢出席嘅原因係唔同政治立場嘅議員都現身，認為喺關心基層上，唔同立場都有空間合作。講番個活動，噚日議員隊代表落場嘅有社民連梁國雄、民主黨胡志偉、醫學界陳沛然同民建聯劉國勳。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk