過去幾年，香港零售同旅遊業市道麻麻，珠寶業都唔好過，不過由謝瑞麟（417）最新年報睇嚟，一切都有起色了。事關年報內披露，謝瑞麟靚太謝邱安儀（Annie）減薪兩年後，上個財年終於加番人工喇。
睇番年報，自2008年Annie接掌謝瑞麟以來，年薪都有500萬至600萬，但2013財年就因為零售放緩，佢人工減至450萬元左右，2014財年又因為搶金熱潮，升番去627萬元。
但之後香港零售業陷入寒冬，Annie人工隨之而縮水，2015、2016財年分別跌至516萬、394萬，減幅近18%同24%。
睇番公司2017財年(截至2月底止)，純利已基本穩住，跌唔夠2%，冇再好似前兩年吓吓跌四成咁得人驚，所以Annie人工又加番上503萬元，加幅達28%。
若按公司純利2,317萬元計，佢年薪等於純利兩成，咁大膽大幅加薪，唔通預告市道好轉中?
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk