南華死忠早前喺亞盃外香港對北韓收到約3,000個球迷簽名，希望南華會高層可以改變南華足球隊「自降」決定，可惜呢個願意好大機會落空，據聞足球部只炒淨助教顧錦輝，足球部辦公室連球員宿舍都要拆，睇嚟南華呢個金漆招牌，唔知仲有冇得淨。
連續三季喺港超聯冇盃落袋嘅南華早排決定「自降」甲組，對港超帶嚟唔少衝擊，更加有「擁南躉」上個禮拜喺銅鑼灣同灣仔等地，收集到約3,000個簽名，聯署向南華體育會要求收回足球隊自降甲組決定，南華體育會就有派員出嚟接信，正所謂，意見接受，態度照舊，既然足總接納佢哋「自降」，高層仲使乜留手，決定派大信封畀足球部淨番嘅幾個負責隊管理嘅職員。
據聞，今次接大信封包括喺「少林寺」足球部做咗管理超過20年嘅朱哥，另外仲有兩個管理，而目前成個南華足球部得番前南華隊長、現助教顧錦輝一個人。另外，南華體育會可能見足球部轉搞業餘，所以已經準備拆埋位處南華體育大樓13樓嘅足球部辦公室同球員宿舍，改為其他用途，咁真係想救番少林足球部都幾難。
合約球員只補一個月糧
有球圈人士聽到南華會連足球部淨底職員都炒埋，都忍唔住話佢哋冇人情味，啲高層到今日都冇人出嚟交代點「自降」已經夠難睇，唔搞港超聯啫，下季都仲要踢甲組架，咁踢甲組聯賽都要有職員帶波衫同帶水等，唔通叫剩番喺足球部唯一職員顧錦輝，一個人頂晒教練同管理職務？
雖然南華同九個球員有合約，但佢哋啲合約點解決都仲有排煩；傳聞南華體育會已同仲有約球員講咗，唔會跟球員所簽嗰份足總合約出糧，只係補一個月糧，而南華球員將向足總求助。